لما ألاقي حقي ضايع والايدين غمت عينيا
لما ألاقي عمري رايح والشباب ضاع من إيديا
كلوا يقتل كلوا يظلم كلوا بيزيد فالازية
ناس بتعلى وناس بتوطى والشباب راحو ضحية
تبقى مصر هيا أمي ولا بتضحك عليا ؟
لما نسمع فالبرامج كل يوم صرخة ولية
طفل يبكي وطفل يصرخ والجراح بتزيد عليا
راح فداها 100 شهيد فكروا الحرية جاية
لو يشوفوا الذل راجع من ولادك يرجعوا للدنيا ديه
تبقى مصر هيا أمي ولا بتضحك عليا ؟
العيون عمالة تبكي والمصايب رايحة جاية
الحياة ضاقت علينا والبلاوي قصادنا اهيا
اللي يسرق واللي ينهب واللي يخطف ضحكة عينيا
واللي يضحك عالغلابة بسلطته ويربط ايديا
تبقى مصر هيا أمي ولا بتضحك عليا ؟
ناس تموت من فقرها والقلوب بتزيد اسية
حتى فالغربة يا بلدي الاهانة بقت عادية
شب ميت وسط أهله بدون جريمة بدون قضية
واللي يطلب حقه خاين والحقيقة تروح ضحية
تبقى مصر هيا أمي ولا بتضحك عليا ؟
لما بأفرح فإنتصارك وأما بأزعل فإنكسارك
والدموع من أسوتك تجري فعينيا
تبقى مصر هيا أمي ولا بتضحك عليا ؟
قبل ما يخلص كلامي قولوا مين جاوب عليا
هوا انا اللي جنيت عليها ولا هيا جنت عليا
تبقى مصر هيا أمي ولا بتضحك عليا ؟
نفسي ترجع مصر أمي وحضنها يضلل عليا
نفسي أرجع بكرة ليها وألمس رملها بإيديا
والنهاية تكون سعيدة وترجع الضحكة لعينيا
مهما يجرى يا مصر فيكي أحلى أم تخاف عليا
